Queridas familias, rematamos un novo curso escolar que estivo cheiño de contos, historias, aventuras, intrigas…
Aquí deixamos o tríptico no que propoñemos algunhas lecturas para este verán. Seguide deleitándovos sempre da lectura e lembrade que:
“A lectura prende a mente e esperta a imaxinación”!
Agradecementos infinitos a todos os colaboradores que tanto nos axudaron este ano cos préstamos da Biblio.
Mil gracias, rapaces e rapazas!!
Aquí van unhas fotiños da exposición:
O alumnado de 6º ao completo, interpretou unha obra de teatro para infantil e primaria na Biblioteca, “Dorothé e a música dos pobos”.
Sinopse da obra:
Dorothé Schubart, unha musicóloga suíza apaixonada polas músicas tradicionais, percorre Galicia na procura de voces que gardan a memoria do pobo. En cada vila atopa mulleres que cantan a vida, o traballo e o sentir do país.
Con axuda da pequena Xoaniña (personaxe ficticio), Dorothé recolle cancións, historias e emocióna que forman parte da alma galega.
A obra fai parada en Erbecedo (Coristanco) onde coñecemos a figura da cantareira María Castro Romero. En Cerceda, coñecemos a Rosa e Adolfina. En Mens (Malpica) coñecemos a Prudencia, Asunción e Manuela. Rematamos en Muxía coa figura de Eva Castiñeira.
Aquí van algúns deses momentos:
A finalidade desta convocatoria, un ano máis, é conmemorar a herdanza desta autora con gran sensibilidade e emoción poética, que escribía con liberdade, poemas nos que describía cos detalles máis minúsculos, pedaciños da súa vida. Pretendemos así fomentar os valores literarios, promover a creación e a difusión cultural de Coristanco e descubrir o talento tendo como inspiración a Asunción Antelo, Rexubeira de Bergantiños.
Aquí deixamos unhas fotiños dos traballos do noso alumnado:
Ao longo do segundo trimestre, levamos a cabo diversas conmemoracións como o Día de Rosalía de Castro (23 de febreiro), Día Internacional da Muller (8 de marzo) e o Día da Poesía (21 de marzo).
Para todas elas, participamos cada clase de infantil e primaria, elaborando peciña a peciña cada parte da nosa escultura.
Unha Rosalía elaborada a partir de diferentes texturas aportadas por cada grupo recíbenos na entrada do centro, amosando unha saia con poemas ou información de diversas escritoras e poetisas, todas elas mulleres.
Por Rosalía de Castro, pola Poesía e por todas as mulleres que tanto loitaron e loitan por unha igualdade real e xusta.
